Kosningar í nánd.

Mikið liði mér þægilega ef að Ágúst Ólafur Ágústsson myndi taka við dómsmálaráðuneytinu frá Sjálfstæðisflokknum. Mér finnst raunverulega fáránlegt að engin hafi áður lagt til að fyrningarfrestur í kynferðisbrotum á börnum verði afnumin. Hugsa að hann yrði frábær dómsmálaráðherra. En það gerist nú ekki nema að Samfylkingin komist í ríkisstjórn. En það yrði víst hættulegt velferð landsins miðað við orð  hægrimannanna í ríkisstjórninni. Öll fyrirtæki munu víst flýja land af því að fjármagnstekjuskatturinn hækkar upp úr öllu valdi. Netlögregla mun beita fasistalegum aðferðum til að koma í veg fyrir skoðunarmyndun. Er það ekki bara? 

Björgólfur Thor hefur einn nefnt það að flytja úr landi með fyrirtæki sitt, Straum Burðarás, og var það vegna þess að þeim hefur verið bannað að gera upp í Evrum. Talandi um nettann fas....ma.

Netlögregla: Lögregla á netinu sem passar upp á að ekkert ólöglegt sé innan íslenskra servera. Það þarf lögreglu þar eins og annars staðar. Líst ágætlega á þá hugmynd Steingríms J. þó ég sé nú ekki alltaf sammála þeim mæta manni.

En svona er þetta alltaf, fastir liðir fjórða hvert ár hjá gamla, þreytta, flokknum... þá er ég að tala um Sjálfstæðisflokkinn.....Framsóknaflokkurinn er líkar gamall og þreyttur.

Nr. 1. Ómálefnanlegur hræðsluáróður Sjálfstæðisflokksins um að Ísland leggist í eyði ef að velferðarstjórn taki við. Gerðist það í Svíþjóð? En í Danmörku? 

Nr. 2. Stefnuleysi Samfylkingarinnar. Er það orðið pínulítið þreytt? Ok. Samfylkingin er ekki pjúra þjóðernissinnaður sósíalistaflokkur eins og VG og ekki pjúra hægriflokkur eins og Sjálfstæðisflokkurinn sem felur sig bak við kapítalismann. Samfylkingin aðhyllist svokallað blandað hagkerfi. Eru meðvitaðir um mikilvægi traustar hagstjórnunar á sama tíma og þeir eru meðvitaðir um velferðismál. Þeir taka hvert mál fyrir sig og leitast eftir því hvað sé best fyrir þjóðina. Þeir eru ekki Á MÓTI virkjunum en heldur ekkert sérstaklega MEÐ virkjunum. Það er ómálefnanlegt. Í dag er ekki grundvöllur fyrir fleiri virkjanir og lang best fyrir landið að fresta öllum þannig pælingum. Ef að grundvöllur skapast fyrir umræddar virkjanir er hægt að skoða málið þó að ég persónulega efist um það verði nokkurn tíman þar sem að við lifum í þekkingarþjóðfélagi, ekki iðnaðarþjóðfélagi. 100 árum eftir nágrönnum okkar miðað við hversu stór hluti hagkerfisins þessi iðnaður er. Sjálfstæðisflokkurinn og reyndar VG stundum líka finnst mér vera einum of einfaldur í hugsun sinni Annað hvort-Eða. Af hverju var ekki hægt að koma á fjölmennari ferðaþjónustu, útibú frá Háskólanum og svo framvegis á Austurlandi í stað þess að henda þangað virkjun og álver sem enginn íslendingur nennir að vinna á. Þannig er það nú bara.

Nr. 3. Tímabundið fyllerí Sjálfstæðisflokksins í umhverfismálum og kvennfrelsismálum. Grænn fálki núna, bleikur fálki fyrir sveitastjórnarkosningarnar í fyrra ef ég man rétt. Come on!!! 

Fótboltasumarið 2007

Nú eru tveir mánuðir í Íslandsmótið í knattspyrnu. Í fyrra gerði ég spá í maí, rétt fyrir mót, en ég er að hugsa um að setja á blogg þetta eina slíka núna.

 

Íslandsmeistarar verða Valsmenn. Þeir hafa einvala lið í hverri einustu stöðu og með gríðarlega breidd, sérstaklega á miðjunni. Líklega eru þeir komnir með markaskorara sem eftir á að skora 12 mörk eða meira. Vörnin er líklega sú besta á Íslandi. Barry Smith á bara eftir að vera betri en í fyrra en í þeim leikjum á Íslandsmótinu sem hann spilaði tapaði Valur ekki einn einasta leik að mig minnir, nema hann hafi komið inn á í tapleiknum á móti Víkingi í Víkinni. Allir þeir sem vita eitthvað um fótbolta vita hvað Atli Sveinn og Birkir Már eru góðir. Steinþór er líka búinn að standa sig í vorleikjunum hingað til. Valur vinnur eftir tuttugu ára Íslandsmeistaratitlaþurrð.

Í öðru sæti verða erkifjendur Valsara, KR-ingar. Hver einasta mannsál í Vesturbænum, fyrir utan mig sjálfan, er alveg 100 prósent viss um að KR vinni mótið núna.  Þannig hefur það verið alla tíð, fyrir hvert einasta mót. Þeir eru svosem með frambærilegt lið greyin enda hafa þeir verið duglegir á leikmannamarkaðnum. Þeir vilja meina að allt hafi það verið frábær kaup. Allt í einu er Óskar Örn Hauksson orðinn yfirburðarleikmaður. Einu kaupin sem ef til vill gera KR-inga að betra liði en í fyrra eru kaupin á Atla Jóhannssyni Vestmanneying. Að vísu mætir KR oftast til leiks með frambærilega leikmenn sem ekki hafa náð saman í nokkur ár. En ég ætla að vera djarfur og spá þeim ofar en ég hugsa að flestir gera, annað sæti.

Þriðja sætið verður hlutskipti núverandi Íslandsmeisturum, FH. Liðið var gríðarsterkt fyrir tveim árum en ekki eins gott í fyrra vegna meiðsla leikmanna. Þeir leikmenn eru að komast í gang á ný og munu þeir nota þetta tímabil til þess að slípa sig saman. Í lok móts verða þeir óstöðvandi.

Í fjórða sæti verður Víkingur. Þeir hafa misst Viktor Bjarka og hugsanlega er Höskuldur Eiríks líka á leið frá þeim. En í staðinn koma ungir og efnilegir leikmenn eins og Gunnar Kristjáns sem gengur til liðs við félaga sinn Jökul Elísabetarson. Þeirra leikur verður í meiri jafnvægi en í fyrra þar sem þeir voru góðir fyrri helming móts en slakar í þeim seinni.

Keflavík verður í fimmta sæti. Þeir eru einhvern veginn alltaf frekar góðir. Hef fátt um það að segja. Bara fullt af tæklingum, ef til vill ættuðum frá Tyrklandi.

Ég held að Skaginn verði ekki ofar en sjötta sæti. Þeir eru einfaldlega ekki með nógu góða leikmenn til að klára heilt mót í topp fimm. Þjálfarinn á eftir að hrekja leikmenn í burtu líkt og forveri hans. 

Breiðablik hélt ég að myndi falla í fyrra minnir mig. Þeir hafa verið með sterka yngriflokka sem ættu að ná að halda Blikum uppi nokkur ár. Sjöunda sæti segi ég.

Fylkir voru að fá Val Fannar. Ljós fyrir lið sem væri annars fallkandítat. Leiðtogi í vörninni og væntanlegur fyrirliði. Verða í áttunda sæti. 

HK munu byrja ágætlega en verða síðan slakir þegar líður á mót. Eru með tvo yfirburðaleikmenn, Gunnleif markmann og Jón Þorgrím en það er bara ekki nóg. Spurning hvað Helgi Kolviðs getur gert komi hann aftur.  

Framarar þurfa að gera eitthvað mikið í leikmannamálum til þess að vera ofar en í tíunda sæti. Jónas Grani og Eggert Stefáns eru líklega bestu leikmenn þeirra. Fram minnir mig mig á hópinn hjá Val þegar þeir féllu þrisvar á fimm árum.

 

Textinn um hvert lið styttist greinilega eftir því hversu neðarlega á spána er litið. Lýsir ágætlega þreytu mína núna. En nóg um þ......ZZZZZZZZZZ

 

 

 

Klám?

 Hér til hliðar gefur að líta forsíðu auglýsingabæklings Smáralindar sem gefin var út núna fyrir komandi fermingarvertíð. Stuttu seinna birtist í Fréttablaðinu frétt um umfjöllun Guðbjargar Hildar Kolbeins á bloggi sínu um það að myndin ætti sér samsvörun í barnaklámiðnaðnum. Eitthvað var hún að tala um hina óspjölluðu hóru og svo framvegis. Það er afskaplega erfitt að vera sammála þessarri annars ágætu konu varðandi þessa mynd. Líklega er það rétt hjá Guðbjörgu að stelpur beygja sig með þessum hætti til að fá einn smurðann eða ósmurðann aftan á sig og líklega þurfa stelpur að opna munninn til að fá einn beinstífann upp í sig. En var þessi mynd gerð með klámið í huga? Hugsanlega ómeðvitað? Ég held ekki. Umræðan er réttlætanleg til að koma í veg að það gerist nokkurn tíman en í þessu tilviki  er ekki um að ræða tilvitnun í klám samkvæmt minni meðvitund. Flestir bloggarar virðast vera sammála mér. Henni til málbóta var umfjöllun Fréttablaðsins meingölluð að mínu mati. Í fyrirsögn greinarinn var hún kölluð ¨Frú Kolbeins¨ eins og hún væri gamaldags gribba með skoðanir sem ekki væri mark takandi á. Það hefði alveg eins verið hægt að kalla hana Soffíu frænku eða Frú Grýlu. Einungis var talað við fulltrúa frá Smáralind en ekki talað við Guðbjörgu sjálfa, annan fjölmiðlafræðing eða fulltrúa frá Feministafélagi Íslands. Er það í ritstjórnarstefnu Fréttablaðsins að einungis sumum skoðunum sé mark takandi á en öðrum ekki. Tengist þetta ef til vill dramanu á einhverjum rannsóknardögum upp í HÍ þegar Guðbjörg kynnti niðurstöður rannsóknar sinnar þar sem hún taldi saman auglýsingar í Fréttablaðinu og í ljós kom að þær komu meira og minna allar frá stofnunum í eigu Baugs? Þar strunsuðu Þorsteinn Pálsson, ritstjóri Fréttablaðsins, og Ari Edwald, framkvæmdarstjóri 365 miðla, út úr skólastofu í Lögbergi þegar þeir fengu ekki að halda ræðu gegn Guðbjörgu vegna tímaleysis. Sjálfur var ég þar og get staðfest að það gerðist. Nú ætlar Stöð 2 að fjalla um þetta. Við skulum sjá hvernig þeir fjalla um þetta málefni.   

Fangelsin í Ameríkunni (frjálsa landinu)

    Á milli þess sem ég horfi á Seinfeld, House og Boston Legal horfi ég á fréttatengt efni eins og Kastljós. Í gær sá ég viðtal Sigmars Guðmundssonar við Íslending nokkurn sem hafði setið í rammgirtu fangelsi í Virginiufylki í Bandaríkjunum ef ég man rétt. Allavega var um að ræða eina fangelsi fylkisins sem tekur mannslíf. Dómstóllinn þar hefur tekið sér þann ákvörðunarrétt hverjir skulu hafa rétt á því að lifa og hverjir ekki, eins hrokafullt og það hljómar, í trúræknasta ríki vesturlanda, Bandaríkjunum. Íslendingar þessi hafði fengið 20 ára dóm fyrir að slá mann með hafnaboltakylfu og taka veskið hans. Morðingi á Íslandi fær ekki meira en 16 ára dóm sama hversu hroðalega morðið var framkvæmt. En hvers vegna er þetta svona ólíkt í Bandaríkjunum og á Íslandi. Í Bandaríkjunum hefur fólk fyrirfram gefist upp á fólki sem fremur glæpi. Fagelsin eru hugsuð sem refsivist í stað þess að vera hugsuð sem betrunarvist eins og víðast í Skandinavíu, löndunum sem við berum okkur saman við. Bandaríska dómskerfið gerir ráð fyrir að glæpamenn fæðist glæpamenn og deyji glæpamenn. Þeir skulu vera haldnir frá almenningi eins mikið og eins lengi og hugsast getur. Skandinavar, þar á meðal Íslendingar, höldum okkur við þá trú að glæpamenn geti breyst. Við einbeitum okkur að því að breyta þeim í stað þess að refsa þeim. Hér á Íslandi heyrir maður oft gagnrýni á dómskerfið sem er svosem réttlætanlegt. En oft er gagnrýnin byggð á samanburði á bandaríska fangakerfinu, með sína áratugafangelsisvistun og dauðrefsingar, sem við sjáum í sjónvarpsþáttum og 10-16 ára fangelsisvistun fyrir morð á Íslandi. Þetta er ekki samanburðarhæft þar sem að þessu leyti eru menningarnar gjörólíkar. Vissulega finnst mér persónulega margir dómar, fyrir til dæmis kynferðisafbrot, vera of lágir. En það ætti að vera byggt á þeirri trú minni að ég held að það taki lengri tíma að breyta kynferðisbrotamönnum en dómurinn segir til um. Ég hef heyrt að stóra fangelsið á Íslandi, Litla Hraun, sé erfitt að lýsa sem staður sem betrunarvist fer fram. Litla Hraun er því nær bandaríska módelinu en því skandinavíska. Ég spyr hvort að það sé sú leið sem við viljum. Í dag er dómsmálaráðherran okkar afskaplega hlynntur Bandaríkjunum í flestum málum án þess að ég viti hvar hann standi í þessum málum. En ef hann er hlynntur bandaríska módelinu er líklega ekkert að fara að gerast í betrunbótum í Hrauninu. Viljum við það? Viljum við kannski bara annan dómsmálaráðherra úr annarri ríkisstjórn, velferðarríkisstjórn?

Gjaldskrá að þínu skapi....hjá strætó!!!

Fann þennan alveg stórkostlega og kaldhæðna link á www.bus.is. Ætli það sé nokkur notandi strætókerfisins sáttur við gjaldskrá Strætó. 280 krónur farið. Þegar ég var svona 8 ára var barnaverðið 25 krónur. Er strætó rekið með hagnað í huga, maður hlýtur að velta fyrir sér hvort svo eigi það að vera.

                                            

          En ég er samt alltaf til í kaldhæðinn húmor. Strætó fær prik fyrir það. 

 

Hann er enginn Gregory House!!!

    Á mínu reglulega netflakki rakst ég á bloggsíðu markmanns Víkings, Ingvars Kale, í knattspyrnu. Þar lýsir hann því hvernig læknir nokkur rændi af honum heilu keppnistímabili með glórulausum mistökum. Grunur leikur á að sami maðurinn hafi meðhöndlað Hauk Inga Guðnason, leikmann Fylkis, sem hefur verið meiddur í fleiri ár. Haukur Ingi þótti afskaplega efnilegur knattspyrnumaður af var á samning hjá Liverpool um tíma. Í kommentakerfi bloggsíðu Ingvars má sjá fleiri sögur af þessum manni. Nú spyr ég, hversu lengi á maðurinn að komast upp með að nafn hans birtist hvergi? Fólk sem er á leið til læknis með hnémeiðsli er bara virkilega óttaslegið að lenda á þessum manni. Læknar eiga ekkert að vera verndaðri en aðrir. Þvert á móti. Maðurinn er að díla við mannslíkamann for kræing át lád, eins og skáldið sagði. Hann er svo sannarlega enginn Gregory House.

Þeir koma þá....kannski.

Jæja,  eftir allt er bara séns á því að ráðstefna aðila tengdum klámi verði haldin á Íslandi. Á bloggi Steingríms Sævarrs kemur fram að hóteleigandi út á landi hafi blöskrað svo umræðan um þessa ráðstefnu að hann hafi ákveðið að bjóða þeim að lúlla og kjafta um sín á milli hvernig best sé að framleiða klám, athæfi sem er bannað með lögum á Íslandi. Það er svosem ekkert hægt að segja, þeir hafa sinn rétt á að koma hingað og tala um eitthvað sem ekki má.....en þeir gera samt.....bara í útlandinu. Afskaplega óheppilegt lagaumhverfi fyrir þessa aðila en þeir vilja endilega fá að koma hingað. Ætli Icelandair fagni ekki núna. Miðað við auglýsingaherferð þeirra fyrir nokkru vonuðust þeir til að einmitt þessir aðilar kæmu hingað, eins undarlega og það hljómar. Aðilarnir mega búist með þó nokkuð fjölmennum mótmælum. Er það bara ég eða heyrðist ekki neitt í meðmælendum ráðstefnunnar fyrr en Hótel Saga úthýsti ráðstefnugestum. Þeir svöruðu engan vegin mótmælendum á meðal kosinna þingmanna og borgarfulltrúa sem og feministafélagsins. Ekki fyrr en nú berast hótanir um líkamsmeiðingar til mótmælenda. En æi nú læt ég staðar numið af þessarri umræðu sem er orðinn allt of algeng.

Af hverju eru allt einu 56 manns að skoða gömlu bloggsíðuna mína sem ég hætti að blogga á fyrir einhverjum þrem vikum síðan. Síðan voru rétt tíu búnir að skoða þessa síðu. Frekar vandræðanlegt.  

VG og Sjálfstæðisflokkurinn undir eina sæng?

    Það er rífandi stemning fyrir því að fella ríkisstjórnina segir Steingrímur J. En í ræðu hans á flokksþingi Vinstri grænna talar hann samt sem áður aðallega um að koma Framsóknarflokki út úr ríkisstjórn en talaði lítið um Sjálfstæðisflokkinn. Hann talar um að ef að ríkisstjórnin fellur yrði það vegna kosningarsigurs Vinstri grænna. Er Steingrímur ekki á leið í ríkisstjórn með Samfylkingu? Er mögulegt að við fáum að sjá VG og Sjálfstæðisflokk saman í ríkisstjórn í vor? Maður hlýtur að spurja sig.

    Ef staðan er svo hlýtur Samfylkingin að vera valkosturinn fyrir það fólk sem vill fella alla ríkisstjórnina, líka Sjálfstæðisflokkinn.

 

                                              

Ekkert klám, Hótel Saga að gera góða hluti.

    Nú rísa frjálshyggjuguttarnir úr rekkju og eru alveg brjálaðir maður. Ástæðan: Framleiðendur klámefnis fékk ekki leyfi á því að halda ráðstefnu hér til að öðlast frekari viðskiptatengsl hjá hvorum öðrum. Nú skellti ég mér á vef Alþingis og fann þessi orð í 210. grein 22. kafla um kynferðisbrot.

210. gr. Ef klám birtist á prenti, skal sá, sem ábyrgð ber á birtingu þess eftir prentlögum, sæta sektum …¹⁾ eða fangelsi allt að 6 mánuðum.
Sömu refsingu varðar það að búa til eða flytja inn í útbreiðsluskyni, selja, útbýta eða dreifa á annan hátt út klámritum, klámmyndum eða öðrum slíkum hlutum, eða hafa þá opinberlega til sýnis, svo og að efna til opinbers fyrirlestrar, eða leiks, sem er ósiðlegur á sama hátt. [Þegar slíkt efni sýnir börn á kynferðislegan eða klámfenginn hátt getur refsing þó orðið fangelsi allt að 2 árum.]²⁾

 

Spurnig hvað sömu frjálshyggjuguttar segðu ef bankaræningjar kæmu hér til lands til að ræða sín á milli hvernig best er að hóta gjaldkerum og svo framvegis. Hvað segðu þeir ef að aðilar sem afneita helförunni vildu fá að halda ráðstefnu hér á landi. Bankarán er ólöglegt á Íslandi. Klám er ólöglegt á Íslandi. Þetta er einfalt. Það er engin sem heldur því fram að hér sé ekki um klámsíður að ræða. Það að afneita helförunni er hinns vegar ósiðlegt. Ekki nóg með að klám sé ólöglegt hér á Íslandi heldur finnst stórum hluta það ósiðlegt líka.

Vissulega er ekkert sem bannar það að hleypa fólki með mikinn áhuga á klámi inn í landið svo lengi sem það býr það framleiðir það ekki hér á landi eins og að ekkert bannar sérlegann áhugamann um morð að koma hingað sem túristi svo lengi sem það myrðir engan en mikið skil ég Hótel Sögu vel að hafa úthýst þessu liði. Hótelið hefði líklega fengið orðspor á sig sem væri býsna erfitt  að ná af.

Kaupmátturinn rís bara og rís.

Hvergi er jafnmikil stéttarskipting og á Ísland en samt snýr stjórnin út úr og er alveg ofboðslega ánægð með sín verk, benda á aukinn kaupmátt. Það vitlausasta sem þeir geta gert. Þeir hefðu alveg getað viðurkennt stéttarskiptinguna og búið til einhverja áætlun til að breyta henni þannig að sem flestir gætu notið kaupmáttarins. Kannski gera þeir það þegar nær dregur kosningar á sama tíma og Sjálfstæðisflokkurinn breytist í bleikann, frjálslyndann, félagshyggjuflokk með áherslu á feminisma. Þeir gera það nefnilega reglulega, nánar tiltekið fjórða hvert ár. Skemmtilegt hvernig Bryndís Ísafold kastar í hlutverk, á blogginu sínu, það er að segja hver einasti ráðherra fær skemmtilegt hlutverk. Ég get svo svarið það að ef að Samfylkingin fer í stjórnarsamstarf við annan hvorn núverandi stjórnarflokka á ég erfitt með að styðja þá ríkisstjórn. Það snýst allt í höndunum á þessum heiðursmönnum í Framsókn og Sjálfstæðisflokknum. Loksins hafa þeir eitthvað gott að segja en þá kemur þetta í ljós. Mesta stéttaskipting í Evrópu ef ég skildi fréttirnar rétt. Og hvernig svara þeir gagnrýninni? Guðjón Ólafur, framsóknargutti, halda því fram að rannsóknir sem stjórnarandstaðan byggi á vitlausum rannsóknum hjá fræðimanni sem ekki sé mark takandi á. Hann svarar svolítið eins og Davíð Oddsson gerði oft. Það er að segja að stjórnarandstaðan væri barasta að misskilja og ætti að hætta þessu væli. Hann talar um að stjórnarandstaðan geri upp á milli fræðimanna. Þá geri ég ráð fyrir því að hann sé að tala um hina eilífa baráttu Stefáns Ólafssonar, prófessors í félagsfræði og Hannesar Hólmsteins Gissurarsonar, prófessors í stjórnmálafræði. Þegar kemur að fátækt held ég að félagsfræðiprófessorinn sé trúverðugri en stjórnmálafræðiprófessorinn. Stjórnmálafræðiprófessor sem réttlætir dauðarefsingar með einu rannsókninni sem bendir á að þær lækki glæpatíðni. Fleiri hundruð rannsóknir hafa bent á að svo sé ekki. Stjórnmálafræðiprófessor sem er viðurkenndur Sjálfstæðismaður og þar með stuðningsmaður ríkisstjórnarinnar. Stjórnmálafræðiprófessor sem ég trúði því statt og stöðugt að yrði gerður Útvarpsstjóri fyrst að Jón Steinar Gunnlaugsson var gerður Hæstaréttardómari. Málið er að það þótti mér ekkert ólíklegt með þá ríkisstjórn sem við höfum í dag. Guðjón Ólafur má þó eiga það að hann er Valsari.